Plantun de Prouvènço

Pèr coumpara dos planto d'encò nostre

Festuca scabriculmis & Fissidens dubius

Festuca scabriculmis

Poaceae Graminaceae

Nom en français : Fétuque à chaumes rudes.

Descripcioun :
Aquesto petugo trachis sus li pendis safrous is adré de mountagno. Fai de mato de fueio di mai primo e plegadisso ço qu'èi un proumié biais pèr la recounèisse (èi pamens pas la souleto). La paumo de flour de 5 à 7 cm caup d'espigueto de 10 à 14,5 mm caduno emé 3 à 7 flour qu'an de lemma de 6 à 9,5 mm emé uno arèsto > 1 mm. La coupo de fueio (tihouso de faire) mostro un esclerenchime de countùni (vèire lou dessin).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Festuca
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 5 à 7 cm
Flourido : Printèms - Estiéu

Sòu : Si
Autour basso e auto : 1800 à 2800 m
Aparado : Noun
Jun à avoust

Liò : Pelouso - Esboudèu - Terraire safrous
Estànci : Subaupen à Aupen
Couroulougi : Ouroufito-Aupenco-Sud-Ouèst
Ref. sc. : Festuca scabriculmis (Hack.) K.Richt., 1880

Mousso-divisado-doutouso

Fissidens dubius

Fissidentaceae

Nom en français : Fissident crête-de-coq.

Descripcioun :
Aquelo mousso dóu gènre Fissidens (peristome divisa, vèire li fotò) trachis sus li roco cauquiero e de cop que i'a au sòu. Es uno mousso pulèu pichoto auto de 1 à 3 cm. Fai partido dóu group qu'a ges de lòngui celulo sus lou bord de la fueio (fotò), pamens se vèi bèn uno bando de 3 à 4 cellulo pu claro. Se recounèis tambèn à sa pouncho de fueio emé un benc e que la costo s'acabo just avans lou bout (fotò). Es couneigudo pèr pas faire trop d'espouroufite, pamens sèmblo pas trop lou cas au nostre.

Usanço :
Se pòu counfoundre emé d'àutri meno dóu meme gènre subretout Fissidens taxifolius qu'a pas lou bout de fueio denta d'un biais irregulié e peréu que la costo vai fin qu'au bout dóu bènc (de vèire au microuscope).